Hún dansaði

Hún kom sem sunnanvindurinn
með sólina handa mér og þér
og hún skein svo ljúft og laðandi
svo lýstist næturhimininn

hún dansaði er dögun rann
hún dansaði er kvöldið kallaði
hún dansaði inn í nóttina
og er morgunskíman merlaði

hún átti það sem eftir var
af eldi sem eitt sinn logaði
hún gaf okkur allar gjafirnar
sem í gær við fundum hvergi

hún hló svo hátt í nóttinni
hún grét er kvöldið kallaði
hún brosti ein til birtunnar
er morgunskíman merlaði

svo fór hún burt í birtingu
er bjarmi dagsins logaði
og sólin hennar systir er
og skýin hennar slæður

við leitum hennar allstaðar
við leitum hennar hér og þar
í birtu morgunskímunnar
í rökkri okkar hugsunar

en hún fór burt í birtingu
er bjarmi dagsins fölnaði
og sólin hennar systir grét
og skýin lutu höfði

hún hló svo hátt í nóttinni
hún grét er kvöldið kallaði
hún brosti ein til birtunnar
er morgunskíman merlaði

Bob Marley

 

Það hafa komið út næstum óteljandi  plötur og geisladiskar með Bob Marley frá fyrstu árum hans sem tónlistarmaður. Útgáfurnar hafa flestar verið illa unnar og upplýsingar sem fylgt hafa með verið rangar og misvísandi. Þetta á sérstaklega við um upptökur sem Bob Marley og hljómsveit hans The Wailers gerðu með hinum dularfulla Lee Scratch Perry, en með honum tóku þeir upp næstum sextíu lög seint á sjöunda áratuginum og snemma á þeim áttunda. Margar ólöglegar útgáfur hafa séð dagsins ljós og því hafa þessar hljóðritanir ekki notið þeirrar virðingar sem þeim ber. Því ber að fagna því að nú loksins hafa þessar  hljóðritanir verið gefnar út með þeirri virðingu sem þeim ber. Útgáfufyrirtækið Trojan records hefur farið meistarahöndum um þessa dýrgripi og notað alla nýjustu tækni til að lögin hljómi sem best. Afraksturinn er að finna í sex diska pakka sem ber nafnið The      complete Upsetter Collection.  Í þessum kassa er að finna allar þær upptökur sem Bob Marley gerði með Lee Perry. Lee Perry var þá með með útgáfu og hljómsveit sem hann kallaði The Uppsetter. Fyrsta lagið sem Perry hljóðritaði með Bob Marley kallast Try me.  Þetta lag vakti töluverða athygli á Marley og hans músik og samstarf hans og Perry stóð yfir í all langan tíma. Rétt áður en hljómsveitin Wailers lagði af stað í heimsreisu árið 1972 hljóðrituðu þeir lagið Soul Rebel sem Marley og Perry sömdu saman. Heimurinn var tilbúinn fyrir Bob Marley and The Wailers og framundan var heimsfrægð. Annað gott við þennan kassa frá Marley er að hann kostar lítið meira en venjulegur tvöfaldur diskur.  Menn eru ekki að smyrja á góðgætið mörgum aurum  og slíkt er orðið fátítt þessa dagana. Það er Smekkleysa sem flytur þennan pakka inn.

Komdu fagnandi.

Ég var flöktandi, sífellt spyrjandi
um sannleikans eina veg
fann þá leitandi, Guð minn huggandi
og leiðin varð dásamleg.

Sannleiksskapandi, gjafir gefandi
Guð á himnum allt sér
helgur guðsandi, friðar flytjandi
og fylgd heitir hann mér.

Ertu grátandi, bænir biðjandi
um bros og líknandi hlíf
komdu fagnandi að krossinum krjúpandi
og Kristur mun gefa þér líf.

Allt um lykjandi, ávallt elskandi
eilífur Guð hann er.
Kærleiksunnandi konungur ríkjandi
á krossinum dó hann þér.

komdu fagnandi að krossinum krjúpandi
og Kristur mun gefa þér líf.

komdu fagnandi að krossinum krjúpandi
og Kristur mun gefa þér líf.

Gamall útvarpsþáttur...Dylan og trúin.

Fyrir einhverjum árum, um páska, gerði ég útvarpsþátt um Bob Dylan og trúargöngu hans. Ég var að fletta í gömlum pistlum og rakst þá á þetta handrit. Mér datt í hug að vinir mínir í Dylanmafíunni hefðu gaman að því að lesa það svo hér birtist það. Kanski hafa fleiri en Dylan grúskarar gaman að því að lesa þetta, það er verst að ég get ekki spilað lögin hérna en ef þið eigið Dylan diska þá megið þið gjarnan spila lögin sem ég tiltek í textanum....um leið og þið lesið.. Vonandi hafið þið gaman að.. 

Lag 1 With God on our side.7.07

Góðan dag og gleðilega páska. Ég heiti Guðni Már Henningsson. Fyrir nokkrum misserum síðan fékk ég þá hugmynd að gera útvarpsþátt um  trú og trúarlega tónlist Bob Dylans. Þegar þessi hugmynd fæddist fannst mér hún dágóð en fljótlega fóru þó að renna á mig grímur og það fleiri en tvær. Auðvitað var ég kunnur tónlist Dylans og textum að ég hélt. En fljótlega kom þó annað í ljós. Á nánast hverri plötu meistarans eru biblíutilvitnanir, bæði ljósar og leyndar. Það er auðséð að strax á unglingsárum var Dylan orðin vel að sér í Biblíufræðum.  Í upphafslagi þessa þáttar, sem nefnist With god on our side, í liði með Guði, tiltekur Dylan ýmsa hluti sem hafa, eða þykjast hafa Guð í liði með sér. Landið, þar sem hann bjó í æsku var í Guðsliði, ættlandið sömuleiðis, þó frumbyggjarnir hafi verið stráfelldir af byssumönnum sem voru með Guð á vörunum, því þú telur ekki líkin ef Guð er við hlið þér. Niðurstaða Dylans er þó sú að ef Guð er með okkur stöðvar hann næsta stríð. Á sömu plötu, The times they are a-changin´sem kom út í janúarmánuði 1964, er að finna annað lag sem hefur beinar biblíuívitnanir. When the ships comes in er í raun túlkun Dylans á himnaríki á jörð sem koma mun er Kristur kemur í annað sinn og Guðs ríki verður á jörðu sem og himnum. Allt hið illa verður yfirunnið og Goliat verður sigraður í eitt skipti fyrir öll. Það er einnig auðheyrt að Dylan er vel lesinn í Opinberunarbókinni.

Lag 2 When the ships come in 3,18

When the ships come in af The times they are a-changin´. Um líkt leyti samdi Dylan annað lag sem hefur svipaðar pælingar. Þetta lag kom þó ekki út fyrr en í október 1985 í þriggja diska safni sem nefnist Biograph. Það nefnist Lay down your weary tune og segir svo í einu erindinu:

Struck by the sounds before the sun

I knew the night had gone

The morning breeze like a bugle blew

Against the drums of dawn.

Lay down your weary tune 4.36.

Þetta var lagið Lay down your weary tune. 1965 sendir Bob Dylan svo frá sér plötu sem átti eftir að hafa mikil áhrif á rokkveröldina. Bringing it all back home heitir platan og Bob Dylan var orðinn rafmagnaður, að hálfu leyti. Önnur hlið plötunnar var semsagt rafmögnuð en hin á hefðbundinn Dylan hátt, það er að segja kassagítar og munnharpa. En það allt saman er allt önnur saga og sú verður ekki rakin hér. Enn er biblían drengnum hugleikin og raunar er það svo að þannig hefur það alltaf verið. Aldingarðurinn Eden verður honum að yrkisefni og hann semur ljóð og lag sem hann kallar Gates of Eden. Textinn er súrrealískur en biblíuívitnanir eru bæði ljósar og leyndar.

Gates of Eden 5.42.

Þetta var lagið Gates of Eden  af Bringin it all back home sem kom út í marsmánuði á því herrans ári 1965. Platan Freewheelin Bob Dylan var sú plata sem kom Dylan á alheimskortið. Maí mánuður á árinu 1963 er því merkilegur í tónlistarlegu tilliti. Þá heyrði heimurinn fyrst af manni sem margir vilja meina að sé merkilegasti tónlistarmaður tuttugustu aldarinnar. Á þessari plötu er Jesús ekki fjarlægur. Í meistarastykkinu Masters of War heldur Dylan því fram að stríðsherrarnir fái ekki einusinni fyrirgefningu frá Kristi því gjörðir þeirra sé þvílíkar og ægilegar  að þeirra bíði ekkert annað en algjör dauði og að hann sjálfur, þeas. Dylan ætli að standa á gröf þeirra þartil hann sé þess fullviss að þeir séu örugglega dauðir.

Masters of war.  4.34.

Eftir að hafa sent frá sér plötuna Blonde on blonde lenti Dylan í mótórhjólaslysi einu dularfullu og var frá tónlistarheiminum í nokkurn tíma. Fyrir jólin 1967 sendi hann frá sér plötu sem kom mörgum manninum á óvart. Blonde on blonde hafði verið tvöfalt albúm með miklum lögum og margræðum textum.  Á John Wesley Harding afturámóti var einfaldleikinn ráðandi. Og biblían alltumlykjandi. Í titillaginu er Kristur sjálfur yrkisefnið en kemur reyndar ekki fram undir eigin nafni heldur er hann persónugerður í John Wesley Harding. Í textanum er John þessi vinur fátæka mannsins. Hann ferðaðist um landið með byssu í hönd, en aldrei nokkurntímann skaðaði hann fólk. Aftur á móti opnaði hann margar dyr, samanber í húsi föðurins eru mörg hýbýli. Menn reyndu að koma allskonar sökum á John Wesley en ekkert gekk. Ekkert var hægt að sanna því Hann gerði aldrei neitt rangt.

John Wesley Harding 2.57.

Þetta var titillag plötu Dylans John Wesley Harding. Í lagi af þessari plötu, sem Jimi Hendrix gerði ódauðlegt, All along the watchtower er krossfestingin yrkisefnið. Kanski frekar ræningjarnir tveir, the joker and the thieve, sem hengu með Kristi og samræður þeirra á milli.

All along the wathtower. 2.31.

All along the watchtower af plötu Dylans, John Wesley Harding.  Á þessari sömu plötu er að finna lag sem heitir Ballad of Frankie Lee and Judas Priest, þar, einsog í titillaginu sjálfu er Kristur persónugerður í líki annars manns.  Hér er frelsarinn kallaður Frankie Lee. Í lokin, eftir miklar samræður á milli söguhetjanna og andlát Frankie Lees, kemst Dylan að því að enginn ætti að vera þar, sem hann tilheyrir ekki. Í blálokin á laginu segir Dylan að ef þú sérð náunga þinn hlaðinn byrðum, þá áttu að leggja til líknandi hendi og létta undir með honum.

Ballad of Frankie Lee and Judas Priest

Það má með sanni segja að plata þessi, John Wesley Harding séu einhverskonar biblíusögur í nútímastíl. Nánast hvert einasta lag er með beinar eða óbeinar tengingar í biblíuna og þá helst Krist sjálfann. Kveðjum þessa ágætu plötu með laginu Drifters escape.

Drifters escape  2.52.

Á plötunni New Morning sem Dylan sendi frá sér 1970 má finna stutt lag sem heitir Father of Night. Þó að það sé stutt er það stórt. Kanski má segja að þarna sé komin fyrsta lofgjörðin sem Dylan samdi til hins almáttuga föður.

Father of night. 1.29.

Á plötunni Blood on the tracks frá árinu 1975 er Kristur enn kallaður til sögunnar. Þó platan sjálf sé í raun óður til konu Dylans, Söru eru líkingarnar sóttar í Biblíuna að miklu leyti. Margir aðdáendur Dylans sáu í honum sjálfum endurlausnara, en Dylan sjálfur hefur ávallt ýtt slíku frá sér og sagst eingöngu vera skáld tónlistar og texta. Þó líkir hann oft þjáningum sínum við það sem Jesús mátti þola. Heyrum lag sem heitir Shelter from the storm.

Shelter from the storm

Af þessari upptalningu má sjá að Bob Dylan þekkti vel sína Biblíu löngu áður en hann frelsaðist. Það gerðist síðan 1978. Hann fór í biblíuskóla og Jesús varð leiðtoginn og frelsarinn. Á tónleikum í San Diego í nóvember 1978 sagði Dylan: Ég spilaði hér á þessum sama stað fyrir ári síðan. Þegar leið að lokum þeirra henti einhver silfurkrossi uppá sviðið til mín. Einhver sem vissi að mér leið ekki vel. Venjulega tek ég ekki upp hluti sem er hent til mín. Ég leit á krossinn og sagði við sjálfan mig, þetta verð ég að taka upp. Sem ég og gerði og setti hann í vasann. Þennan silfurkross tók ég með mér til næstu borgar sem var í Arisóna. Mig minnir að það hafi verið Phoenix og mér leið jafnvel enn verr þar en í San Diego. Ég sagði við sjálfan mig, ég þarfnast einhvers í kvöld, sem ég hef ekki prófað áður, ég veit ekki hvað það er. Ég fór í vasann og fann þennan silfurkross og ef manneskjan sem henti honum til mín er stödd hér í kvöld vil ég þakka fyrir mig.

Changing of the guards. 6.32.

Changin of the guards af plötunni Street legal frá árinu 1978.

Nú var okkar maður í sögunni orðinn sanntrúaður kristinn maður. Og einsog gerist með alla menn, þá koma þeir tímar að spurningum þarf að svara. Og Dylan hefur það framyfir marga menn að hann kann að semja sínar spurningar. Í laginu Senor spyr hann Guð ýmissa spurninga sem brunnu þá í hjarta hans. Á hvað leið er ég, og hvernig kemur mér til með að líða. Svo segir hann í lokin einsog sannkristinn maður,

-I just gotta pick myself up off the floor

I´m ready when you are, Senor.-

Senor 5.43

Senor af plötunni Street Legal. Dylan sendir svo frá sér plötu sem inniheldur eingöngu trúarlega söngva, enda maðurinn frelsaður. Slow train coming heitir platan og vakti feikna athygli og umtal. Ýmsir héldu að nú væri Dylan loksins orðinn kolruglaður og ekki lengur krónu virði. Aðrir sem fylgdu Jesú á hinum þrönga vegi stukku hæð sína í loft upp, ýmist í fullum hjálpræðisherskrúða eða án. Dylan var ekki að tvínóna við hlutina, annaðhvort fylgirðu Jesú eða að þú ferst. Hlutirnir voru ekki flóknari en svo. Heimsendir var hinumegin við hornið og Jesú legði brátt af stað öðru sinni til jarðar. Eitt var örugg, ef þú þjónaðir ekki Guði, þá þjónaðir þú ljóta kallinum.

Gotta serve somebody. 5.25.

Gotta serve somebody af Slow train coming.  Tónleikahald Dylans á þessum tíma var brösugt. Hann spilaði eingöngu sína trúartónlist og flestir áhorfendur púuðu á goðið. Því hafði hann

kynnst fyrr, þegar hann tók sér rafmagnsgítarinn í hönd og setti í samband. Á tónleikum í San Francisco, 13. Nóvember 1979 tilkynnti hann að þessir tónleikar væru undir eftirliti Krists.

I believe in you. 5.05.

Þetta var hinn gullfallegi sálmur Dylans, I believe in you. Í næsta lagi, Precious angel reynir sögumaður að sannfæra konu eina um ágæti kristindómsins. Og að það sé ekki til neinn guð nema Guð. Á einum stað segir Dylan. 

 My so called friends have fallen under a spell

They look me squarely in the eye and they say all is well

 Can they imagine the darkness that will fall from the high

When man will beg god to kill them and they wo´nt be able to die.

Precious angel. 6.30.

Precious angel af Slow train coming. Plötunni lýkur með spádómi um endurkomu Krists. Allt mun lúta Guði sem hefur eyru til að heyra og augu til að sjá. Þú þarft ekki að gráta, þú þarft ekki að deyja og þú þarft ekki að brenna. Þegar hann kemur verður hinu vonda útskúfað og hið góða mun ríkja. Heyrum lagið When He returns.

When he returns.4.30

Í júní 1980 sendi Dylan frá sér plötu sem heitir Saved, eða frelsaður. Þessi plata fékk slaka gagnrýni, bæði tónlistarlega og textalega. Tónsmíðarnar þóttu ekki burðugar og textarnir hálfgert svartagallsraus. Þó voru þeir í raun og veru bara ákall Dylans til almættisins. En fæst þessara laga hafa öðlast sess í ódauðlegu lagasafni meistarans og nánast aldrei heyrast þau. Dylansafnarar eru margir í heiminum og þetta er sú plata sem þeir setja sjaldnast á fóninn. Þó má finna þarna frambærileg lög einsog Solid rock og In the garden.

In the garden fjallar um Krist í Getsemane, í Jerúsalem og þegar hann læknaði blinda manninn, þegar hann reysti Lasarus upp frá dauðum og þegar hann sjálfur reis upp á þriðja degi.

In the garden -5.58

Shot of love kemur út í ágúst 1981. Sú fékk betri gagnrýni en Saved frá árinu áður. Enn voru þó sumir menn og þó aðallega kanski gagnrýnendur ekki sáttir við endurfæddan Dylan. Eitthvað hafði hann þó linast við að boða eld og brennistein. Á Shot of love má heyra eitthvert alfallegasta lag sem Dylan hefur samið Every grain of sand. Sálmurinn fjallar að einhverju leiti um feril Dylans sem frelsaðs manns. Gullfallegt lag sem myndi sóma sér vel í hvaða sálmabók sem væri.

Every grain of sand-6.11

Gagnrýnendur tóku svo sannarlega gleði sýna á ný er platan Infidels kom út í nóvember 1983. Menn töluðu um að hinn gamli góði Dylan væri snúinn aftur. Lagasmíðarnar voru orðnar sterkari en á þremur síðustu plötunum á undann. Boðskapurinn líkari því sem hann var á John Wesley Harding, prédikuninn ekki eins augljós. Það voru engin smámenni sem spiluðu á þessari plötu. Gítarleikarar voru auk Dylans sjálfs, þeir Mark Knopfler úr Dire Straits og Mick Taylor sem eittsinn var í Rolling Stones, á bassa var Robbie Shakespear og félagi hans, Sly Dunbar var á trommunum og á orgelinu var Alan Clark sem þá var í Dire Straits. Kristur var ekki langt undan í lögunum og í upphafslagi plötunnar er hann kallaður til sem Jokerman.

Jokerman 6.18.

Í þessu lagi, Jokerman  eru biblíutilvitnanir svo mýmargar að ómögulegt er að tína þær til. Sem dæmi, þá fann ég ritgerð uppá tuttugu og eina blaðsíðu á netinu, eingöngu um þetta lag. Í upphafi gaf Guð mönnunum jörðina og nú eru það þeirra reglur og lög sem gilda. Að vísu eru okkar vestrænu lög að miklu leyti byggð uppá kristilegu hugarfari og siðfræði okkar er kristileg og samviska okkar á að vera Guði kærkomin en enn vantar mikið uppá að gjörðir okkar séu Guði þóknanlegar. Þetta eru skoðanir margra og þær koma fram í texta Dylans við lagið License to kill.

License to kill 3.34

Það gefur augaleið að það er ekki hægt að fjalla ítarlega um Jesú Krist og Guð almáttugan í textum Dylans í tveggja tíma útvarpsþætti. Það væri nær að einhver tæki sig til og skrifaði vel lærða doktorsritgerð um efnið. Lengra verður ekki komist að sinni. Ég vona að hlustendur hafi haft gagn og gaman að þessari umfjöllun um Bob Dylan sem enn í dag gengur með Guði. Ég ætla að enda þessa umfjöllun með lagi þar sem Dylan einusinni enn persónugerir Krist í líki dauðlegs manns. Af plötunni Oh Mercy frá 1989 kveð ég með laginu The man in the long black coat. Ég heiti Guðni Már Henningsson og aftur óska ég hlustendum gleðilegra páska.

The man in the long black coat. 4.30.

 

Sigur Rós...til hamingju!

Sigurrós fékk í gær verðlaun á Q hátíðinni en tónlistartímaritið Q stendur árlega fyrir ýmsum viðurkenningum. Sigurrós fékk verðlaunin í flokknum Nýsköpun í hljómi og eru vel að þeim verðlaunum komin. Þegar þeir þökkuðu fyrir sig fluttu þeir þakkarávarpið á íslensku. Sérlegur tónmeistari Sigurrósar er Birgir Jón Birgisson. Það er tímaritið sjálft sem útnefnir vinningshafa. Ég samgleðst með Sigurrós og sendi þeim kveðjur.

Sigur Rós á sigurbraut

Upp með hendur og niður með buxur...

Hommasprengjan er eitthvert mesta tækniundur hins vestræna heims, leyfi ég mér að fullyrða hér og nú. Hugsið ykkur ef að Rússar hefðu ráðið yfir hommasprengju í seinni heimsstyrjöldinni, í umsátrinu við Stalíngrad....varpað svosem einsog þremur hommasprengjum á Þjóðverjana og...búmm...allir hefðu tekið það stinnt upp!! Upp með hendur og niður með buxur....og menn elskast úti í náttúrunni í staðinn fyrir að murka lífið hvor úr öðrum....En ég hef reyndar smá áhyggjur yfir því ef óprúttnir náungar kæmust yfir hommasprengjuna... hvað ef einni slíkri yrði varpað inn á fund í háæruverðugu Alþingi? Á Arnarhól á 17. júní?  Á 200.000 manna tónleika hjá Iron Maiden? Gæti orðið gasalegt! Við verðum að passa vel uppá þessa hommasprengju og sjá til þess að pörupiltar komist ekki yfir þessa ágætu uppfinningu..En ég er ekki alveg að sjá samtenginguna við hamstra og viagra!!!

„Samkynhneigðarsprengja" hlýtur Ig Nóbelsverðlaun

Eitt lítið ástarljóð....

  ...af því að ástin er, eða á að vera sterkasta aflið. Og þetta ljóð er til konunnar minnar....

Þú gafst mér vorið og vindana hlýju

og vefur mig örmum alla tíð

þú gafst mér daginn og nóttina nýju

og nú einsog alltaf er elska þín blíð.

 

Þú færðir mér fögnuð með brosinu þínu

og frá þér alltaf alúðin skín

þú opnaðir ástina í hjartanu mínu

og eilífðarsólin er alla tíð þín.

 

Þú fallega kona ert kærleikans yndi

sem kom inn í heiminn samtímis þér

og þó að ég hrjáður í mótstraumum syndi

þá stendur þú alltaf við hliðina´ á mér.

 

Bringing it all back home...Bob Dylan

 

Bringing it all back home kom út í maí 1965 og þá bylti jörð sér.  Nánast. Bob Dylan hafði tekið rafmagnið í sína þágu og var farinn að spila rokk og ról.  Þetta olli þvílíkum hræringum að menn eru enn að ræða þessi mál og enn er rifist. Reyndar hafði Dylan komið fram á Newport hátíðinni og þá verið með rokkband með sér. Þá var mikið púað og galað og gólað. Reyndar hélt þessi hegðun tónleikagesta áfram í hljómleikaferð sem Dylan fór í og fræg er upphrópun eins gestsins er hann kallaði á tónleikum á Englandi Júdas. Og þannig litu margir á Dylan, hann hafði svikið folktónlistina og trúbadúrinn sem  hafði fjallað um hin mörgu mein heimsins hafði selt skrattanum og rokkinu sálu sína. Meira að segja bárust honum morðhótanir. Reyndar fór Dylan ekki alla leiðina á Bringing it all back home, því helmingur plötunnar var rafmagnaður en hinn ekki. Dylan var á seinni hliðinni einn með sinn kassagítar.Síðan hafa mörg vötn runnið til sjávar og í dag og reyndar í mörg ár er Bringin it all back home talið mikið meistaraverk sem svo sannarlega hefur skilið eftir sig spor og reyndar má segja að heil   hraðbraut hafi orðið til við útkomu þessarar plötu. Frá fyrstu tónum Subterranean homesick blues breyttist rokkið og varð aldrei aftur það sama.

Textinn í þessi lagi er veluppbyggður með rími hér og þar, þreföldu, tvöföldu, innrími og Guð veit hvað. Og þarna rappaði Dylan í fyrsta skipti. Blúsriffið   sem þetta lag er byggt uppá er ættað frá Chuck Berry og laginu hans Too much monkey business. Næsta lag, She belongs to me, er talsvert öðruvísi, einföld melódía undir folkblús áhrifum en textinn er einhver magnaðasti samsetningur sem heyrst hafði á vinylplötu til þess dags er lagið kom út. Ástarljóð af fyrstu og bestu sort. Það er hægt að taka út setningu og setningu og láta þær standa einar og óstuddar. Ég hvet alla, sem þekkja ekki þetta lag til hlítar, að leggja eyrun að hljómtækjum sínum og heyra hreina og tæra snilld.

Maggies farm ...af Bringin it all back home. Svona músik hafði aldrei heyrst áður og þetta var meiri bylting í gerð dægurlaga en hægt er að gera sér grein fyrir í dag. Ekki bara lagasmíðin sjálf heldur hafði  svona textasmíð aldrei  áður heyrst í rokki og róli.  Þetta var allt öðruvísi tónlist en vinsælasta hljómsveit heims þá og síðar, The Beatles var að gera. Þarna var byggt á gömlum blús og rokkið frá Elvis fært fram á við.

Einhver fallegasta melódía  sem Dylan hefur samið við eldheitan ástartexta sem enginn nema Dylan hefði getað samið er Love minus zero/ no limit.

Tímaritið Rolling Stone komst svo að orði á árinu 1972; þessi plata er sannarlega verk Dylans sjálfs, en hann var þess megnugur að draga fram það besta í öllum hljóðfæraleikurunum, leyfa þeirra tónlistarhæfileikum að njóta sín. Þegar þessi plata kom út var það líkt og þegar eldfjall tekur uppá því að spúa eldi og brennisteini, öllum að óvörum. En, þá er komið að enn einum blúsnum á Bringin it all back home. Hér er á ferðinni hraður blús og í eðli sínu er hann einfaldur. Outlaw blues nefnist slagarinn. Enn einn blúsinn fylgir í kjölfarið og nefnist hann On the road again.

Þá er komið að síðasta lagi þeirrar hliðar Bringin it all back home sem er rafmagnaður. Hér fer sækadelíkan á flug hjá meistaranum, hann veður úr einu í annað, en samt má greina í textanum einhvers konar æfisögu Dylans, vafða inní undarleg ævintýri. Lagið heitir Bob Dylans 115^th dream.

Þá er komið að þeirri hlið Bringin it all back home sem er órafmögnuð. Sumir vilja halda því fram að þessi hlið sé sterkari en hin fyrri. Það er álitamál, en þessi órafmagnaða hlið er feikisterk. Þarna rúllar hver klassíkerinn af öðrum og venjulegir menn hefðu unað glaðir við sitt þó þeir hefðu ekki afkastað meiru en að semja eitt þeirra laga sem þarna er að finna. Billy Bragg segir; ég heyrði fyrst Mr. Tambourine man inn í hlustunarklefa í plötubúð. Ég fór inn í þennan klefa sem drengur en kom út sem Tambórinumaður. Hljómsveitin Byrds tók þetta lag uppá sína arma, stytti það um nokkrar mínútur, setti gítarriff og tólfstrengjagítar inní ásamt bassa og trommum og fínum röddum og lagið fór allsstaðar á toppinn. Samt sem áður er útsetning Dylans miklu flottari, hún er minimalísk og tilfinningaríkari ásamt því að textinn er lengri og merkilegri. Byrds bjuggu til úr Tambourine man gott popplag en flutningur Dylans er löngu orðinn klassískur.

Næsta lag heitir Gates of Eden. Einsog svo oft er biblían nálæg Dylan. Aldingarðurinn Eden er hér umgjörð sem Dylan vefur inní sinn súrealíska texta sem sækir margt í Opinberunarbókina.

Því næst er lag sem er eitt af þeim magnaðri frá Dylan. Þar fer hann á kostum í sýrðri þjóðfélagsgagnrýni og fræg er setningin hans um bandaríkjaforseta sem öðru hvoru þarf að vera nakinn. Textinn í þessu lagi einu gæti verið efni í marga útvarpsþætti. Orðsnilldin og orðaleikurinn er svo magnaður að ég er eiginlega orðlaus...

Þetta meistaraverk heitir It´s alright ma I´m only bleeding og er næst síðasta lag plötu Dylans Bringin it all back home. Þá er komið að síðasta lagi plötunnar en langt í frá því síðsta. Margir listamenn og hljómsveitir hafa tekið það uppá arma sína og flutt það. Nægir að nefna Them og Van Morrison. Stórkostlegt lag sem heitir Its all over now baby blue.

Bringin it all back home kom út í maímánuði 1965 og markaði dýpri spor í rokkheiminum en flestar aðrar plötur. Sannleikurinn er jafnan einfaldur og sannleikurinn um Bob Dylan er sá að hann er snillingur. Og það mikill snillingur

 

Hér er byrjunin.

Kvæði sem heitir Orðið og er birt hér að neðan er eiginlega framhald á öðru kvæði sem heitir babýlon borg ánauðar. Ég hafði svosem ekki ætlað mér að birta það hér en þarsem Zeriaph bloggvinur minn hafði svo falleg orð um það ákvað ég að birta það. Við þetta kvæði er til afar fallegt lag eftir Frey Eyjólfsson vin minn en við höfum verið í nokkuð langan tíma verið að taka upp tónlistina hans við kvæðin mín, þeas trúarleg kvæði eftir mig. Vonandi kemur það einhverntímann út. En hér er kvæðið og munið að þetta er í raun texti við lag.

Hlustið! hann þegir hinn illi

og er orðinn skar

Guð minn tók stafinn

er kúgarinn bar

í Babýlon borg ánauðar.

 

Heyrið! hann lagstur er lágt

í Helju fordæmdrar

Guð minn tók stafinn

sem kúgarinn bar

í Babýlon borg ánauðar.

 

Jörð mín! í friði þú skalt

ég gef þér mitt svar

ég molaði stafinn

sem kúgarinn bar

í  Babýlon borg ánauðar.

 

Tré mín! gleðjist þið nú

Drottinn allsherjar

hann sprekaði stafinn

sem kúgarinn bar

í Babýlon borg ánauðar.

 

Guð minn! þú hreinsaðir burt

með sópi eyðingar

þú molaðir stafinn

sem kúgarinn bar

í Babýlon borg ánauðar. 

 

 

Jörð mín! í friði þú skalt

ég gef þér mitt svar

ég molaði stafinn

sem kúgarinn bar

í  Babýlon borg ánauðar.

 

Orðið.

 

Hlustið! Hann er hér hinn eini

sem í öndverðu var

Guð minn er Orðið

og Orðið var þar

í upphafi sköpunar.

 

Heyrið! Hann risinn er upp

í himinn fagnaðar

Guð minn á soninn

og sonurinn var

í upphafi sköpunar.

 

Guð minn! Þú gafst okkur líf

og gjafir eilífar

Þú molaðir stafinn

sem kúgarinn bar

í Babýlon borg ánauðar.