200.000 Naglbítar, Hjartagull

 

Þriðja plata 200.000 naglbíta nefnist Hjartagull og kom út árið 2003. Það er skemmst frá því að segja að Hjartagull er einnig eyrnagull...eða konfekt. Það játast hér og nú að undirritaður hefur alltaf litið á Naglbítana sem eina fremstu, ef ekki allra fremstu rokksveit Íslendinga. Vögguvísur fyrir skuggaprins, önnur plata Naglbítanna kom út árið 2000, en sú fyrsta, Neondýrin umt haustið 1998. Afraksturinn sem sé þrír geisaladiskar, hver öðrum betri en ólíkir þó. Einhverjum finnast þessi afköst kanski ekki ýkja mikil, þegar helst þarf að gefa út plötu fyrir hver jól svo nýjungagjarnir tónlistarneytendur stroki ekki nafn viðkomandi listamanns út úr skammtímaminni sínu..en hljómsveitin var stofnuð á Akureyri 1993 undir nafninu Gleðitríóið Ásar. Nafninu var seinna breytt í Ask Yggdrasils en árið 1995 keppti hljómsveitin í Músíktilraunum undir núverandi nafni þar sem hún lenti í 3. sæti. Naglbítarnir féllu ekki í þá gryfju að gefa út á hverju ári, heldur vanda betur það sem þeir sendu frá sér. Fyrri plöturnar tvær lifa því enn góðu lífi í dag og hafa elst vel og hljóma í eyrum ferskar og fínar.  200. 000 naglbítar er tríó eða var...því líklegast er hljómsveitin hætt, og var skipað þeim Kára Jónssyni bassaleikara, Benedikt Brynleifssyni trommara og söngvaranum og gítarleikaranum Vilhelm Antoni Jónssyni sem jafnframt er aðal laga og textahöfundur sveitarinnar. Axel Árnason var trommari á  tveimur fyrstu plötunum en hann starfar nú sem upptökumaður í hljóðverum og tók til dæmis upp þessa plötu félaga sinna. Hljómur plötunnar er mjög góður, hreinn og þéttur og augljóst mál að Axel kann vel til verka enda þekkir hann þá naglbíta vel og veit hvað þeir vilja. Lagasmíðar Vilhelms eru grípandi og jafnframt djarfar og augljóst er að hann þekkir vel til rokksögunnar. Hann hefur greinilega gert sér grein fyrir því að rokkið var ekki fundið upp af Nirvana eða Strokes svo dæmi séu tekin, heldur af bandarískum blökkumönnum um miðja síðustu öld. Einnig er gaman að heyra að Brian Wilson Beach Boys maður er tekinn alvarlega af ungum rokkdrengjum í dag. Textar Vilhelms er frekar dökkir en haganlega ortir. Tildæmis verða honum endalok heimsins að yrkisefni í lagi sem nefnist Sól gleypir sær og ekki er nú sungið daglega um þann atburð. En það sem meira er, textarnir eru á íslensku og ekki neitt leirbull eða miðjumoð.  Og þá er bara að skella þessum geisladiski í spilarann og athuga hvort að ég hafi farið með tómt bull og staðlausa stafi. Vonandi að 200.000 naglbítar taki saman á ný...einhverntímann í framtíðinni