Mig þyrstir

 

 

 

 

Nú stend ég hér hvernig sem á því stendur
og stari í leiðslu á krossana tvo
ég get ekki hreyft mína gegnumstungnu hendur
sem græddu þau sár sem enginn vildi þvo.

Og vindurinn þýtur og veltir á undan sér
vandamálum næstu tvö þúsund ára
ekki vegna mín, nei vegið ekki að mér
en vökvast mun leiðin milljónum tára.

Ég get ekki efast né augun mín þvegið
og efalaust munið þið síðuna særa
Faðir fyrirgef en ég heyri´ekki hvað þið segið
einsog forðum er þið gáfuð mér gullið tæra.

Og vindurinn þýtur og veltir á undan sér
vandamálum næstu tvö þúsund ára
ekki vegna mín, nei vegið ekki að mér
en vökvast mun leiðin milljónum tára.

Og sem ég stend á spýtunni þeirra
og stari á þá sem að komu fyrstir
mæður og Maríur sem gátu´ekkert fleira
mæli ég uppgefinn og einn; mig þyrstir.

Og vindurinn þýtur og veltir á undan sér
vandamálum næstu tvö þúsund ára
ekki vegna mín, nei vegið ekki að mér
en vökvast mun leiðin milljónum tára.

Athugasemdir

[Rósa Aðalsteinsdóttir, 20.10.2008 kl. 12:54]

Sæll og blessaður

Flott ljóð eins og venjulega.

Vona að allt gangi vel hjá þér og eins í Mosaik

Guð blessi þig og varðveiti.

Kær kveðja/Rósa

[Guðjón H Finnbogason, 20.10.2008 kl. 16:52]

Flott hjá þér félagi.Eigðu góðan dag.

[Gulli litli, 21.10.2008 kl. 18:57]

Flottur ad vanda...þú ert töffari..

[Bryndís Böðvarsdóttir, 23.10.2008 kl. 19:08]

Vá!

[Guðsteinn Haukur Barkarson, 24.10.2008 kl. 23:30]

Snilld ... tær snilld! Takk Guðni. 

[Steinunn Helga Sigurðardóttir, 25.10.2008 kl. 06:54]

þetta er yndislegt elsku vinurinn minn góði.

ég sakna þín vinur minn !

s