Best varðveitta leyndarmál matargerðarlistarinnar!

 

 

 

Best varðveitta leyndarmál íslenskrar matargerðarlistar er staðsett í gistiheimilinu Langaholti á Snæfellsnesi. Ég var að keyra um þann dásamlega og undurfagra stað Snæfellsnes um síðustu helgi. Náttúrufegurðin þar er engu lík. Fjallgarðurinn, sveitirnar, fjaran og síðast en ekki síst sjálfur Jökullinn eiga sér hvergi hliðstæðu. Við ókum um nesið í kvöldsólinni og litirnir sem voru á boðstólum voru engu líkir. Jarðarlitirnir stórkostlegir og síðan fjöllin máluð undarlegum pastellitum og himininn yfir Snæfellsnesinu er....himneskur. Einhverntímann um kveldverðartíma fór hungrið að gera vart við sig. Við ókum upp að gistihúsinu Langaholt sem lætur skelfilega lítið yfir sér. Ekki vorum við viss um að þar væri hægt að kaupa eitthvað í gogginn en reiknuðum þó með að hægt væri að fá kaffi og í versta falli uppþornaðar kleinur. Er við komum inn í lágreista bygginguna tók á móti okkur þvílíkur matarilmur að aldrei höfðum við fundið áður slíkan ilm. Að sjálfsögðu var hægt að kaupa mat á staðnum og þvílíkur matur! Það kom uppúr dúrnum að tveir öndvegiskokkar voru á staðnum, nefnilega sjálfur Rúnar Marvinsson og Hafþór sem oft er kendur við dúóið Súkkat. Þeir þekkja Nesið einsog eigin bragðlauka en það voru einmitt þeir, öllufrekar Rúnar Marvinsson sem kom Hótel Búðum á kortið á sínum tíma. Við vorum leidd að borði í fallegum borðsal og fengum handgerðan matseðil í hendurna. Boðið var upp á forrétti og fimm eða sex aðalrétti auk eftirrétta. Allt voru þetta fiskréttir, keila, karfi, skötuselur og slíkt. Ég fékk mér karfa í dijon og maturinn var engu líkur. Ég hef aldrei áður fengið jafn góðan fiskrétt á æfi minni sem er orðinn talsvert löng í annan endann! Þvílíkur matur!! Við fengum mat fyrir fjóra og fjóra eftirrétti og borguðum fyrir þetta rétt rúmar tólf þúsund krónur, varlega áætlað myndi þetta kosta 20-30.000 þúsund krónur í höfuðstaðnum. Ég gef eldhúsinu á Langaholti 100 stjörnur af tíu mögulegum... Mér skildist á vertinum að Rúnar og Hafþór ætluðu að kokka á Langholti í allt sumar. Hráefnið fá þeir á nesinu sjálfu, Arnarstapa og í Ólafsvík og ef til vill fleiri stöðum. Akstur á löglegum hraða frá Reykjavík að Langaholti er um það bil ein og hálf klukkustund, mæli með að fólk skelli sér. Það á enginn eftir að sjá eftir því. Einnig eru leigð út herbergi á staðnum og eru þau hin huggulegustu. Mæli með Langaholti, ég fer þangað alveg örugglega aftur.

Athugasemdir

[Steinunn Helga Sigurðardóttir, 22.7.2008 kl. 20:18]

frábært að lesa þetta. ég hef líka borðað matinns hans bæði á búðum og á tjörninni. frábær kokkur ! súkkat var líka frábært !!!

knús á þig vinurinn minn !

steina 

[Brattur, 22.7.2008 kl. 21:44]

... ég er svo heppinn að verða á þessum stað um næstu mánaðamót... og gista... var ekki búinn að átta mig á þessu með matinn... tilhlökkunin ennþá meiri eftir að heyra þessa lýsingu þína...

[Heiða Eiríks (IP-tala skráð) 23.7.2008 kl. 00:00]

Þorkell Símonarson (Keli, sem samdi textann við Tangó) rekur Langaholt. Gisti einmitt hjá honum í fyrra, en þá voru þessir kokkar ekki komnir. Samt alveg prýðilegur matur. En nú langar mig aftur, enda æðislegur staður, og eins og þú segir, rétt hjá. Vúhú!

[Gulli litli, 23.7.2008 kl. 13:26]

Munnvatnið fyllti lyklaborðið.....Íslenskur fiskur í Íslenskri náttúru...mmm.

[Rósa Aðalsteinsdóttir, 23.7.2008 kl. 22:46]

Sæll og blessaður.

Dálítið langt fyrir mig að fara þangað. Gott að vita um þennan frábæra stað. Þökk sé þér. Það er meiriháttar fallegt á Snæfellsnesi. Væri sko til í að fara þarna aftur og aftur.

Á að drífa sig á Kotmót? Því miður fer ég ekki og er orðið óvenjulangt síðan ég fór þangað. Vona að ég komist í sept. á spennandi mót í staðinn.

Guð vei með þér og þínum.

Kær kveðja/Rósa

[Gunnar Páll Gunnarsson, 2.8.2008 kl. 08:16]

Góðir kallar samankomnir á góðum stað í góðu eldhúsi og fullt af góðum fiski. Betra getur það ekki verið.