Hundasúr máfur.

 

 

 

 

 

 

Einsog sumarið sem ratar oft á villigötur og heldur sig hinumegin við Esjuna ráfa ég oft af  leið. Sem mér var sýnd dag einn meðan haukar svifu um loftin blá og hrokinn var í sæti sínu. Liðað hárið féll um klettabeltin og og himininn gladdist. Ég hélt út í ógöngur með girðingum og beitti gljúpu sverði ótt og títt, hjó mann og annan en aldrei samt sem áður hvarf fuglinn minn mér sjónum. Sjónum sem ég bæði óttaðist og hataðist við en jafnframt hefur mín æðsta ósk alltaf verið sú að geta umfaðmað hafið, orðið umfaðmaður. Gekk norður uns hvarf mér norðurlandið og ég settist á öll skautin og horfði alltaf til suðurs, þarsem sumarið hverfur oft. Tveir fuglar erum við, annar er sumarfuglinn fallegi að austan hinn á það til að lifa á úrganginum í miðborginni þarsem sem lækurinn liðast um malbik til þess eins að þrauka og þá er myrkrið oft svart en stundum þó tært einsog vorkvöld í Reykjavík eða einsog þau voru forðum. Gjarðir komu og fóru og það var sorg. Svo undarlegt sem það er er erfitt að rífa sig upp en á mig herjar eitthvað sem ég skil ekki og sumarfuglinn fallegi veit ekki af því eða veit hann? Straumar hita upp  og leika um lendur mínar og ég er enn á villigötum sem leiða mig í fáránlegar athafnir sem engum eru samboðnar. Svo kemur kvöld og svo kemur morgun og þá er ég kanski staddur hinumegin við hvergi með blóðbragð í munni og hugann fullan af hundasúrum en veltenntur fjallgarðurinn glottir móti sól. Og ég sakna þín.

Athugasemdir

[Gulli litli, 5.5.2008 kl. 08:04]

svalt...

[Steinunn Helga Sigurðardóttir, 5.5.2008 kl. 14:03]

guðni minn, þurfum við ekki að fara að tala saman !!!enga vitleysu !

BlessYou

steina 

[Marta B Helgadóttir, 5.5.2008 kl. 22:01]

Tek undir með Steinu, þarf ekki að ræða þetta ... minn ljúfi bloggvinur.

[Guðni Már Henningsson, 5.5.2008 kl. 22:41]

Við skulum ræða saman....en hvað er að trufla ykkur elskurnar mínar?

[Marta B Helgadóttir, 8.5.2008 kl. 15:29]

....bara svo mikil angurværð í þessu