Ónýt tölva

 

Tölvan mín er verri en ónýtur Trabant. Ég var að skrifa níð um hana hérna rétt áðan...og þá slökkti hún bara á sér, gúddbæ.. Ég var búinn með mikla og svakalega ritgerð um það hversu fáfengilegt þetta apparat væri, hvernig hún hefur reynt á þolinmæði mína og eiginlega hagað sér sem hinn versti durgur, þá slekkur gerpið á sér! Það er ekki nóg með að ég sé í vondu skapi útaf Svíaleiknum áðan, heldur bætir þetta gargan gráu oná svart með því að þykjast vera eitthvað. En ég vil semsagt koma því hér að að þetta greppitrýni er ónýtt ónýtt og aftur ónýtt!!! Þess vegna hef ég lítið getað bloggað undanfarið, þori ekki að gera það lengur í vinnutímanum, á víst að vera að lesa aftan á geisladiska þar.  Svona getur lífið stundum verið harkalegt við mann, að eiga ónýta tölvu er ekkert skemmtilegt skal ég segja ykkur, þetta dauðyfli hefur aldeilis reynt á taugarnar. Það tekur svona umþaðbil tíu mínútur að kveikja á henni, kortér að opna síður og svo er hún full af vitleysu...sem ég á kanski einhvern þátt í að hafa komið inn hjá henni, ok viðurkenni það. En nú ætla ég bráðum að farga þessu illfygli og ekki skal hún fá virðulega útför, aldeilis ekki. Það verður ekki sagt um hana í minningargrein að hún hafi verið húsbóndaholl, hvað þá að hún hafi búið eiganda sínum fallegt og notalegt heimili, aldeilis ekki. Hún hefur fengið mig, sannkristinn manninn til að næstum því blóta..það heyrðist stöku sinnum ansvítans..eða næstum því. Það er verst að eiga ekki fyrir almennilegri, húsbóndahollri tölvu sem væri einsog hugur manns, skrifaði jafnvel fyrir mann kvæði eða tvö! Og nú þori ég ekki lengur að skrifa meira því meindýrið gæti tekið upp á því að slökkva á sér..,

ps ef þið viljið selja mér tölvu á því sem næstum ekkert þá megið þið gjarnan láta mig vita... áður en ég missi glóruna og glætuna...

Athugasemdir

[Gunnar Páll Gunnarsson, 17.1.2008 kl. 21:53]

Aumingja Guðni,tölvulaus maður á íslandi í dag Hryllingurinn á sér engin takmörk. Skítt með frammistöðu strákanna ykkar í handbolta og helfararskrif sannkristinna á blogginu eru hreinar barnagælur miðað við þetta. Gott að ég er ekki í þínum sporum. Samúðarkveðjur.

PS: Steina og Stefán Baldurs biðja að heilsa. ( og takk fyrir að laáta hann vita af mér)

[Matti sax, 17.1.2008 kl. 23:01]

Þetta er ljótt að heyra. Vonandi finnurðu nýja tölvu fljótlega. Gangi þér vel

[Marta B Helgadóttir, 17.1.2008 kl. 23:33]

Tölvulaus geturðu ekki verið. Myndi kíkja á smáugl á mbl.is þar finnur maður ýmislegt gagnlegt.

Fyndið að lesa þessa færslu hjá þér, og hér sat ég í kvöld að reyna að semja færslu um heimilistölvuna mína en á nokkuð öðrum nótum þó ....

[Guðrún Jóhannesdóttir, 18.1.2008 kl. 01:34]

úff! ég er fegin að vera ekki tölvan þín
ef ég ætti eina afgangs, þá....

[Ylfa Mist Helgadóttir, 18.1.2008 kl. 08:24]

samúðarkveðjur. Ekkert er verra en svik heimilismeðlima. Skil vel að þú sért í uppnámi!

[Steinunn Helga Sigurðardóttir, 19.1.2008 kl. 09:36]

elsku guðni, þetta er alveg greinilega þinn besti vinur, hún sýnir þér hvar þú þarft að takast á við í persónuleikanum, þú þarft t.d. að vinna á þinni þolinmæði, það er löngu vitað, af okkur sem þekkjum þig vel, en hún segir það bara einu sinni enn, svo við vinir þínir, þökkum tölvu fyrir að hafa fórnað sér til dauðans til að kenna þér...

Kærleikurinn Mestur

BlessYou

steina 

[Linda, 21.1.2008 kl. 01:12]

oh dear, ég vona svo sannarlega að þú sért búinn að fá tölvu við hæfi!! 

knús.

[Guðni Már Henningsson, 21.1.2008 kl. 08:52]

þakka ykkur vinir fyrir hlýleg orð í minn garð og fyrir að taka þátt í hugarstríði mínu sem er alveg að fara með brisið í mér. Og Steina, þú af öllum!!! Ég er einhver þolinmóðasti maður Íslandssögunnar, hvernig gastu stungið mig svona í bakið? Ég er sár og tárin eru að leita að leið úr sárum míns innra manns...................