Zooropa

 

Árið 1993 ætluðu U2  að taka upp svokallaða ep. plötu fyrir Evrópu legg tónleikaferðarinnar Zoo tv. Fljótlega óx þessi smáskífa upp í fullorðinsstærð og varð að stóru plötunni Zooropa. Þeir héldu áfram þarsem Achtung baby sleppti og þeir þróuðu áfram tilraunatónlist sína með danstakti fyrir klúbba. Titillag plötunnar sver sig þó í ætt við Joshua tree og ljúfu ballöðurnar þar. Mest allur afgangurinn af Zooropa er þó meira ögrandi en sú annars ágæta plata Joshua tree. Þetta gætti þýtt í raun að platan sé ekki í fókus og einhverskonar kakófónía en sú er ekki raunin. Þarna er að finna stórkostleg augnablik og nefni ég lög einsog Daddys gonna pay for  your chrashed car, geimdiskósmellinn Lemon, möntruna Numb þarsem The Edge fer á kostum og hið stórkostlega lag Stay, faraway so close sem er einn alfallegasti ástarsöngur U2. Lokalagið syngur svo Johnny Cash. Þegar lok plötunnar nálgast er menn sannfærðir um að þarna er ein almagnaðasta plata U2.

 U2 voru sjálfir við stjórnvölin ásamt Brian ENO og Daniel Lanois var ekki langt undan. Þessi blanda hefur sýnt sig vera einhver sú albesta sem menn hafa fundið upp. Zooropa var sjötta  platan frá Macphisto og félögum og kom út   í júlí mánuði 1993 og fór í efsta sæti beggja vegna atlantsála.

Selectt  sagði um plötuna,- Þetta er raunverulega fyrsta skrýtna platan þeirra. U2 virðast vera í einhverju rugli, en samt sem áður er Zooropa eitt stórt kynæsandi spurningamerki

Netfyrirtækið All music guide gaf henni fjórar stjörnur og kallar hana kraftmikla, skemmtilega, gáskafulla, leikhúslega, fágaða, stíliseraða ásamt ýmsum öðrum lýsingarorðum. Q magasin bætir við- lögin numb og Lemon fara með hljómsveitina á einhvern nýjan áfangastað.

Lemon má með góðu móti kalla geimaldar þýskt diskó.

Stay, faraway so close er hreint afbragð og jafnframt einn alfallegasti ástarsöngur sem drengirnir hafa látið frá sér fara.

The Times segir um Zooropa. Þessi plata hefur sent tónlist U2 inn í aðra vídd. Þessi plata er mjög snjöll og ef U2 verða einhverntímann stærri en þetta, munu þeir springa. Svo mörg voru þau orð. 

Síðasta lag plötunnar er dálítið sérstakt. Bono sagði um þetta lag, þetta er eitthvert albesta lag sem U2 hefur sent frá sér og ég syng það ekki einusinni. Sú aldna hetja Johnny Cash syngur lagið The wanderer með U2.

 

Slowhand!!!

Eric Clapton ásamt hljómsveit mun koma fram á tónleikum á Íslandi í sumar. Tónleikarnir á Íslandi eru liður í Evróputónleikaferð Claptons í kjölfar útgáfu tvöföldu safnskífunnar Complete Clapton.
Tónleikarnir á Íslandi fara fram í Egilshöll föstudagskveldið 8. ágúst.

Eric Clapton er án efa eitt af stærstu nöfnunum í tónlistarheiminum.
Clapton hefur einn manna verið vígður þrisvar sinnum inn í Rock and Roll Hall of Fame fyrir sólóferil sinn og þátttöku sína í hljómsveitunum Cream og The Yardbirds. Clapton er 18 faldur Grammy verðlaunahafi og hefur verið aðlaður af bresku drottningunni fyrir frammúrskarandi störf á tónlistarsviðinu.

Gælunafn Claptons er "Slowhand" og er hann jafnan álitinn af aðdáendum og gangrýnendum einn af bestu gítarleikurum allra tíma.
Rolling Stone tímaritið setti Clapton í fjórða sætið yfir bestu gítarleikara allra tíma og einnig á lista yfir áhrifamestu tónlistarmenn allra tíma.

Nýlega kom út tvöfaldi safndiskurinn Complete Clapton. Diskarnir innihalda 36 lög frá rúmlega 40 ára ferli Claptons sem sólólistamanns og með hljómsveitum eins og: Cream, Blind Faith og Derek and the Dominos. Degi eftir útgáfu disksins kom út ævisagan "Clapton, The Autobiography".

Á Evróputónleikaferð sinni í sumar mun Clapton fylgja eftir útgáfu safndisksins og flytja lög einsog: Sunshine Of Your Love, White Room, Layla, I Shot the Sheriff, Knockin ´On Heaven´s Door, Cocaine, Wonderful Tonight, It´s In The Way That You Use It og Tears In Heaven.

Tónleikar Claptons á Íslandi eru gríðarlegur hvalreki á fjörur tónlistaráhugafólks enda um að ræða eitt af stærstu nöfnunum í tónlistinni í dag og án efa einn af stærstu listamönnum sem mun hafa sótt landann heim.

Tónleikar Clapton fara fram í Egilshöll og verður höllinni skipt í tvö svæði á svipaðan hátt og á tónleikum Duran Duran árið 2005.
Rúmlega 10.000 aðgöngumiðar verða í boði á tónleikana.

Fyrirkomulag forsölu á tónleika Claptons á Íslandi 8. ágúst verður kynnt í næstu viku

Clapton með tónleika á Íslandi

Hver er hvers?

Ekki er sama hvernig aðstæðum er snúið við þau tækifæri er koma þegar enginn á von . Ef eitthvað kemur í hugann og það er jafnvel myrkur svo ekki sé talað um aðsteðjandi hættur, jafnvel vandamál þá er ekki úr vegi að grípa til þess að hugsa sér eitthvað annað. Jafnvel detta í hug að gera það sem eittsinn var efst í huga, og þá með reisn. En ekki er víst að tími vinnist til, því tíminn bíður ekki bakvið lokaðar dyr með fingur fyrir munni, ekki biður hann um hljóð. Vont land til yrkingar er vont land til yrkingar, svo langt sem augað sér. Því held ég að það sé best að bíða og vona ef takandi er mark á því sem stendur skrifað, bíðið og vonið! Allar nánari upplýsingar má finna.

VONARSTJARNAN.

 

Ekki minnast á morgundaginn

ekki muna eftir því sem gerðist í gær

við erum hér saman í stjörnunnar ljósi

og sjálf nóttin er bæði gegnsæ og tær.

 

Sýndu mér heiminn sem áður var hulinn

því hér er vor stund og augnablikið

taktu mig í fangið og frelsið mér gefðu

því frostrósabeðið  er gróskumikið.

 

Ekki gráta þær gleymdu stundir

sem gærdagur deyddi með berum klóm

vertu mér minning um eilífa æsku

en  ekki um gaddfreðið frostrósablóm

 

Ekki minnast á morgundaginn

ekki muna eftir því sem gerðist í gær

við erum hér saman í stjörnunnar ljósi

og sjálf nóttin er bæði gegnsæ og tær.

 

Nú skuggarnir dansa og dögunin kemur

og draumurinn bráðum úti er

þú munt sjá að ég var til staðar

þá stund sem helguð var mér og þér.

 

Ekki minnast á morgunn sem kemur

sem munaðarfull löngun í huga þér

komdu í fang mitt og frelsið mér gefðu

þú fegurð sem ekki  ætluð var mér.

 

Ekki minnast á morgundaginn

ekki muna eftir því sem gerðist í gær

við erum hér saman í stjörnunnar ljósi

og sjálf nóttin er bæði gegnsæ og tær.

 

 

Arthur Alexander

Arthur Alexander fæddist 10.maí árið 1940 í Florence, Alabamaríki í Bandaríkjunum. Móðir hans og systir sungu í kirkjukór og faðirinn spilaði blues á knæpum og notaði viskýflösku til að slæda. Í sjötta bekk gekk hinn ungi Arthur í gospelsveit og þar með trúlofaðist hann tónlistinni, en sambúðin átti eftir að verða stormasöm.

Í skóla kynntist hann textasmið að nafni Tom Stafford og saman sömdu þeir lag sem heitir, She wanna rock. Útúr þessu spratt hljómsveit og lagið Sally Sue Brown var hljóðritað. Mörgum árum síðar tók Bob Dylan þetta lag.

Lonely just like me sem kom út 1993 er síðasta plata Alexanders. Á þeirri plötu endurhljóðritaði hann nokkur af sínum frægari lögum og bætti nýjum í safnið. Platan er hreint eyrnapáskaegg. En snúum okkur aftur að upphafinu. Hljómsveitin tók upp You better move on eftir Alexander og lagið sló í gegn. Varð reyndar stærsti smellur Alexanders. Margt varð til þess að Arthur fylgdi laginu ekki eftir. Á þessum tíma var mjög erfitt fyrir svarta og hvíta að vinna saman og þá sérstaklega í Suðurríkjunum. Mörg vandamál komu upp þegar Arthur Alexander og hljómsveit hans fóru í tónleikaferðalag og Alexander gerðist fráhverfur tónlist að sinni.

Arthur Alexander reyndi aftur fyrir sér í kringum 1970 og gaf út plötu sem fór fyrir lítið. Hann hóf þá störf sem strætisvagnabílstjóri og starfaði sem slíkur í fimmtán ár. Lagið You better move on var tekið upp í stúdíói sem hann og vinir hans hjálpuðust við að koma á laggirnar og nefndist Fame. Það var skammstöfun fyrir Florence Alabama Musical Enterprise. Þeir klæddu veggina með eggjabökkum og settu eitt segulband inn í eitt hornið. Þar voru síðan tekin upp fræg lög með flytjendum á borð Arethu Franklin, Percy Sledge og Wilson Pickett.

Eftir að hafa starfað sem    strætóbílstjóri í fimmtán ár réðist hann í það stórvirki að hljóðrita plötu á ný. Það var nefnilega þannig að tónlistarmenn og unnendur höfðu ekki gleymt honum, hver annar getur státað af því að Rolling Stones. The Beatles og Bob Dylan hafi tekið lög eftir þá. Það getur Arthur Alexander.

Keith Richards gítarleikari í Rolling Stones sagði eitt sinn; þegar við og The Beaatles fengum færi á því að hljóðrita lög þá tókum við lög Arthurs Alexander, þeir tóku Anna, við You better move on. Það ætti að segja nóg. Svo mörg voru orð Keith Richard.

Tónlist Arthurs er skemmtileg blanda af soul, blues, country og poppi. Textar hans eru angurværir og lögin melódísk. Þegar platan Lonely just like me kom út vakti hún athygli og er almennt talin hans besta plata.

Upphafslag Lonely just like me heitir If its really got to be this way. Sjálfur Robert Plant söng það er gefin var út minningarplata um Arthur Alexander, en hann lést mjög snögglega eftir útkomu Lonely just like me. Meðal annarra flytjenda á þessari minningaplötu má nefna Roger McGuinn, Elvis Costello, Graham Parker, Mark Knopfler, Nick Lowe og Frank Black.

Munaðarlausar minningar

 

 

 

 

 

 

 

Eitt er víst að væntingar þínar
stöðugt versna á tímum sem nú
allt sem ég á, já vonirnar mínar
eru svo miklu minni en þú.

Munaðarlausar minningar þínar
muna sinn fífil á grösugri hæð
ég kom sem haustið með heiftingar sínar
sem hamslausar engjast í sinni smæð.

Gakktu því frá mér götuna breiðu
sem gagnslaus reynist manni sem mér
Handan við hornið allt er til reiðu
hamingjan bíður eftir konu sem þér.

Ég trúði á mátt minn og megin

 

Ég trúði á mátt minn og megin

og meiraðsegja á ást

Hér var það öllum að óvörum

og ekkert um það að fást

ég yfirleitt gáði allsstaðar

en yfir þig sást.

 

Langar voru þær leitirnar

og lengi þurfti´ ég að kljást

við allslags lýð og ófögnuð

en aldrei þú fyrir mér lást

ég yfirleitt gáði allsstaðar

en yfir þig sást.

 

Ég þvældist um fjöll og firnindi

uns farartækið mitt brást

ég sá aðalinn og almúgann

og alltaf skal að þeim dást

ég yfirleitt gáði allsstaðar

en yfir þig sást.

 

Ég hentist yfir hóla og mel

og hélt að ég myndi nást

ég skrámaði mig á steinunum

og stundi og fann þá þjást

ég yfirleitt gáði allsstaðar

en yfir þig sást.

 

Ég kom svo hingað lafhræddur

og hélt ég þyrfti að slást

þá sá ég mátt þinn og megin

og meiraðsegja......ást

nú yfirleitt sé ég þig allsstaðar......

Joy Division

 Hljómsveitin  Joy Division var stofnuð þegar líkvaka pönksins stóð yfir. Joy Division varð fyrsta bandið, eftir pönkið, tilað láta ekki reiðina og kraftinn verða leiðandi afl í tónsköpun sinni, heldur viðkvæmniog tilfinningar.  Þeir voru með synta sem var algjört tabú hjá pönkurum og laglínur þeirra voru meira grípandi. Þeir voru melódískir með dimma texta Ian Curtis, sem oftar en ekki fjölluðu um einsemdina og um einangrun. Á meðan að breska pönkhreyfingin hristi upp í heiminum með óbeisluðum krafti sínum á seinni hluta áttunda áratugarins hafði Joy Division engu minni áhrif með hljóðlátum stormi sínum.

Hljómsveitin var stofnuð snemma árs 1977, stuttu eftir að Sex Pistols kom fram í fyrsta sinn í Manchester. Bernard Albrecht gítarleikari og   Peter Hook bassaleikari höfðu hist á tónleikum Sex Pistols og síðar stofnað hljómsveitina Stiff Kittens. Eftir að hafa auglýst eftir söngvara og trommara, gengu þeir Ian Curtis söngvari og Steve Brotherdale til liðs við þá tvímenninga. Þeir skiptu um nafn og kölluðu sig Warsaw eftir samnefndu lagi Bowies. Þeir komu fram  fyrst opinberlega í maímánuði 1977 í Manchester Electric Circus. Þeir hituðu þar upp fyrir Buzzcocks ogg  Penetration. Eftir að hafa tekið upp nokkur demolög hætti Steve Brotherdale  trommari og Stephen Morris tók sæti hans við trumburnar. Í ágúst mánuði skiptu þeir enn um nafn og Joy Division varð til.   Joy Division fundu þeir í bók Karol Cetinsky um síðari heimsstyrjöldina, The House of Dolls. Í bók þeirri voru fangar í útrýmingarbúðum nasista neyddir til að kalla hús eitt Joy Division, eða gleðideildina,  en þar neyddu nasistar fangana til samræðis.

Snemma árs 1978 spilaði Joy Division víðsvegar um norður England og vöktu töluverða athygli. Rob Gretton, plötusnúður varð umboðsmaður þeirra. Þeir vöktu einnig eftirtekt þeirra Tonys Wilsons, tónlistarfréttamanns og eiganda Factory records, og Derek Branwood starfsmannns RCA sem seinna hljóðritaði tónlist Joy Division sem átti að verða fyrsta plata sveitarinnar. Á  þessum upptökum má heyra það sem seinna varð vörumerki Joy Division, eyrðarleysi Ian Curtis, drynjandi bassagang Hooks og hvöss gítarriff Albrecht.

Þessar upptökur hefðu átt að verða hylltar sem  pönkklassík en þegar tæknimaður nokkur bætti ofan á upptökurnar synthesæserum hættu þeir við allt saman. Það hafði skapast nýtt sánd og það vildu þeir ekki byggja á þessum lögum heldur semja ný. Reyndar komu þessar upptökur svo út tíu árum seinna undir nafninu Warsaw. Fyrsta stóra platan kom út í júlí 1979 og hlaut sú nafnið Unknown Pleasures. Reyndar hafði komið áður ep platan An ideal for living. Stóra platan hlaut góða gagnrýni og dvaldist langddvölum á óháða vinsældarlistanum

Tónleikar Joy Division seinni hluta árs 1979 vöktu umtal, sérstaklega vegna bágs heilsufars Ian Curtis. Hann var flogaveikur og átti það til að hníga niður á konsertum. Einnig var undarleg framkoma hans á konsertum farin að verða hluti af hans eigin lífi og brátt varð erfitt að greina þar á milli. Eftir stutt hlé kringum jól 1979 og hljómleikaferð um Evrópu hófu Joy Division að hljóðrita plötu númer tvö og sendu frá sér smáskífuna ágætu Love Will Tear us Apart. Sú smáskífa hlaut góða dóma en samt sem áður komst hún ekki lengra en inná óháða listann. Eftir tónleika í maí mánuði fengu meðlimir Joy Division tveggja vikna frí fyrir fyrirhugaða Bandaríkjaferð. Tveimur dögum fyrir brottför fannst Ian Curtis látinn, hann hafði hengt sig.

Áður en Ian Curtis dó höfðu meðlimir ákveðið að ef einhver hætti í bandinu yrði það samstundis leyst upp. Kaldhæðnislegt er til þess að hugsa að 1980, eftir dauða Curtis var blómaskeið Joy Division. Love will tear us apart var gefið út afur og fór þá í þrettánda sæti vinsældalistans. Í ágúst kom svo stóra platan, Closer út og loks fór saman góð gagnrýni og mikil sala. Closer fór í sjötta sætið.

Closer kom út í ágústmánuði 1980 og einsog áður sagði fékk hún fína gagnrýni. AMG gefur henni tildæmis fimm stjörnur af fimm mögulegum. Closer er ferðalag inní kalda vonlausa veröld fulla af grimmd og söknuði. Það er lítil sem engin hlýja í tónlistinni, kaldur málmkenndur ryþmi einokar hana. Söngur Ian Curtis er fjarrænn, en samt sem áður er nærvera hans mjög mikil. Beittir gítarar og rifin syntariff fullkomna svo þetta frystihús, sem þrátt fyrir allt hefur einhverja hlýju.

Ian Curtis varð tuttugu og þriggja ára. Eftir dauða Curtis stofnuðu eftirlifandi meðlimir hljómsveitina New Order en það er allt önnur saga.

 

Kvöldljós

 

 

Komdu til mín föla kvöldljós

og kenndu mér það fyrst

sem ég mun læra´ að lifa af

því lundin  mín er þyrst

 

Sýndu mér ljótu lygina

og legðu mér orð í munn

segðu mér loksins söguna

sem öllum öðrum er kunn

 

Ég get verið einn

ég get verið þú

ég get verið allsstaðar

en aðeins hér og nú

 

Sýndu mér  syndina einu

og ég skal kyssa þig

dansaðu síðan er dögunin

daðrar við aðra en mig

 

Hver veit um þá vissu þína

sem vefst æ fyrir mér

að lífið sé alltaf liðin tíð

sem að lokum engin sér

 

Ég get verið einn

ég get verið þú

ég get verið allsstaðar

en aðeins hér og nú

 

Komdu til mín er kvöldið mitt

kallar hátt og snjallt

ég skal greiða skuldina

og skilja eftir allt.

 

Elton John gefur 120 mótórhjól.

 

Elton John hefur gefið læknum og hjúkrunarfólki í Lesotho 120 mótórhjól til að ferðast um fjallahéruð landsins. Elton John ásamt félaga sínum David Furnish fór til Lesotho á laugardaginn var, en hann er á tónleikaferðalagi í Suður Afríku, og afhenti gjöfina. Þetta á efalaust eftir að koma sér vel því erfitt er að ferðast um fjallasvæðin og fátæktin er gríðarleg. AIDS er mjög útbreitt og allt að 23 % fólks á aldrinum frá 15 ára til fimmtugs er smitað. Heilbrigðisráðherra Lesotho hefur ábyrgst viðhald hjólanna. Elton John stofnaði  AIDS sjóð fyrir nokkrum árum og er afkastamikill í baráttunni gegn þessum hroðalega vágesti.